Nòvas


Comunicat de Premsa

COMUNICAT DE PREMSA
CAMPANADA D'ALARMA OCCITANA A L'INSTALLACION DELS CONSELHS DEPARTAMENTALS DELS 2/3 D'ABRIL DE 2015

Los 2/3 d'abriu de 2015 (segon los departaments) vendrem saludar l'installacion de las novèlas assembladas departamentalas e, amb la CAMPANADA, lançar l'alarma sus la situacion catastrofica ont se trapan la lenga e la cultura occitanas dins cada departament.

S'agís del patrimòni de nòstre departament, de nòstre país, patrimòni viu e istoric. E lo patrimòni viu es tant important e fragil coma l'autre patrimòni istoric, aquel qu'es material.
Cap a una situacion de l'occitan qu'es estada declarada per l'UNESCO en « Grand Dangièr » la mobilizacion s'impausa, de la basa segur, e tanben de las amassadas territorialas.
 
E a la basa constatam qu'existís una demanda fòrta d'occitan tre que i a una ofèrta de qualitat. O avisam cada jorn dins las escòlas, los balètis, las accions culturalas.
A aquesta demanda, las associacions respondon lo mai sovent gaireben solas. Cap d'iniciativa de l'Estat e una accion dels poders publics qu'es notòriament de mai en mai indigenta, subretot dins
l'ensenhament, e quasi nulla dins lo domeni de la cultura.
Las collectivitats se devon implicar mai e agir amb determinacion per balhar un avenidor a lor patrimòni, qu'es la riquesa d'uèi e de deman de lor territòri.
E la responsabilitat dels elegits es plan, al minimum, de transmetre en bon estat a las generacions a venir lo
patrimòni recebut en eiretatge.

Dins aquestes temps de crisi que passam, nos objèctan sempre las dificultats budgetàrias. Es una falsa « bona rason ».
- Al nom de la crisi refusan de mandar de pompièrs quand la selva, patrimòni natural, crèma ?
- Vendan los canadairs al motiu que i a de problèmas budgetaris en prometre de los crompar tornarmai al cap de la crisi ?
E ben, çò que fan actualament per l'occitan sembla aquò. En realitat, òbran CONTRA l'occitan.

Amb nòstra CAMPANADA volèm alertar los elegits del Departament e lor dire que se devon metre al trabalh activament e amb eficacitat. Que se devon balhar los mejans d'evitar un desastre cultural a nòstre país. Atal degun podrà pas dire qu'es pas estat assabentat.
Salvar lo patrimòni rapòrta totjorn de beneficis a tèrme long. Calguèt l'obstinacion capuda de qualques bauges per salvar, 100 ans abans los comjats pagats e lo torisme de massa, la Ciutat de Carcassona, salvar l'abaciala e las clastras de Moissac, las arenas de Nimes : vesèm uèi coma es estat pagant e portaire d'avenidor.
Pèrdre son patrimòni es totjorn s'apaurir. Lo daissar se destruire es roïnar la collectivitat que los elegits n'an la responsabilitat.

UN PAÍS QUE DEFEN PAS SA CULTURA E SA LENGA DEFENDRÀ PAS RES

L'accion se definís per las necessitats de la situacion. Per l'occitan cal :
– un budgèt especific a la nautor de l'enjòc,
– un elegit referent e de personals dedicats e competents,
– una novèla convencion per l'ensenhament signada amb lo Rectorat,
– un sosten fòrt a la iniciativas popularas e associativas e particularament dins l'ensenhament coma Calandreta,
– un engatjament pels collègis immersius vitals per l'avenidor de la lenga,
– de dispositius especifics per ajudar la creacion occitana e sa difusion,
– una accion transversala dins los domenis dels Departaments (comunicacion, libres e bibliotècas, rotas/senhaletica...)
– la creacion d'un Conselh de Desenvolopament de l'Occitan per faire viure una democracia participativa delà las eleccions.

INICIATIVA LENGADÒC E CALANDRETA : CONFEDERACION / FEDERACION REGIONALA LENGADÒC
This email address is being protected from spambots. You need JavaScript enabled to view it.